Изложба „Музеј на женски приказни“ во Битола, Прилеп и во Крушево

Изложба „Музеј на женски приказни“ проследена со разговори ќе биде отворена деновиве во градовите Битола, Прилеп и Крушево во организација на Локомотива – центар за нови инцијативи во уметноста и културата како дел од проектот „Културата во улога на територијален развој и социјална кохезија” реализиран во рамки на програмата за Децентрализирана соработка помеѓу регионот Долна Нормандија (Франција) и Македонија.
Проектот „Културата во улога на територијален развој и социјална кохезија“ започна во 2014. Проектот е програмски развиен и имплементиран од Локомотива, Скопје во соработка со областа на заливот Мон Сен Мишел од регионот Долна Нормандија, Франција.
Музеј на женски приказни е проект кој произлезе од идејата да се истражи, согледа и (ре)афирмира улогата на жената во општествено-политичкиот, социјалниот и семејниот контекст преку исчитување на културните значења, симболи, асоцијации, задскриени зад историските факти, од првата половина на 20-тиот век во Битола, Прилеп и Крушево со околијата на Пелагонискиот регион.
Ко-авторки на „Музеј на женски приказни“ се Искра Гешоска, Христина Иваноска, Виолета Качакова и Биљана Тануровска-Ќулавковски.
Целта на „Музеј на женски приказни“ е да се откријат и деконструираат преку сублимни, социо-културни референтни напомени, историските факти позади кои постојат конкретни општествени односи и динамика, како и идеолошки и дискурзивен апаратус, и нивното учество и влијание во создавањето на културните значења и еманципацијата на жената од минатото до денес.

Со цел да се добијат релеватни информации и материјали за темата која се обработува, во 2014/2015 година се реализираше истражување кое ко-авторките го артикулираа во аудио-визуелна изложба, проследена со разговори и публикација. Изложбата и разговорите ќе се реализираат во Битола, Прилеп и Крушево во периодот од 15 септември до 30 октомври 2015 година, а публикацијата ќе биде објавена во 2016 година.

Изложбата во Битола ќе биде во НУ Заводи и музеј од 15 до 29 септември, ќе биде отворена во 19 часот, а од 20 часот ќе има разговор со Александар Литовски, Ѓорги Пулевски и ко-авторките на проектот. Во Прилеп во НУ ЦК Марко Цепенков отворање во 19 часот, а од 20 часот и разговор со Љупчо Печијарески, Рубин Белчески и ко-авторките на проектот. Изложбата во Прилеп ќе трае од 01 до 13 октомври, Во Крушево во НУ Историски музеј – Уметничка галерија „Никола Мартиноски“ од 15 до 30 октомври. Изложбата ќе се отвори во 12 часот, а од 13 ќе има разговор со Зоран Богески, Даница Јанакиевска, Ѓорги Пулевски и ко-авторките на проектот.

Партнери во реализација на изложбата се НУ Заводи и музеј Битола, НУ ЦК Марко Цепенков Прилеп и НУ Историски музеј Крушево.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.