Бојаџиев ќе настапи во Битола и во Охрид, потоа следи настап во „Карнеги хол“

Македонскиот пијанист и композитор Дуке Бојаџиев со својот проект „Сон, верба, љубов“ ќе се претстави пред македонската публика во Хераклеја во Битола на 7 август и во Античкиот театар во Охрид на 9 август. Бојаџиев ќе настапи со неговиот ансамбл: Исмаил Лумановски (кларинет), Тања Царовска (вокал), Мартин Ѓаконовски (контрабас), Мартина Блажеска (вокал), Костас Анастасиадис (перкусии), Владимир Крстев (стринг-квартет).

Билетите од вчера се во продажба преку продажната мрежа на „Купи карти за сѐ“ по цена од 400 денари.
„Сон, верба, љубов“ во себе ја инкорпорира музиката што Дуке Бојаџиев ја создаде за филмовите „До балчак“, „Сенки“ и „Војната заврши“, потоа композиции од неговиот албум „Љубовта е патот“, како и нови, досега неизведени творби. Проектот „Сон, верба, љубов“ ќе биде изведен и во „Карнеги хол“ во Њујорк на 8 октомври годинава, со камерниот оркестар на Македонската филхармонија.

На концертот, покрај тоа што ќе прозвучат фрагменти од филмската музика на Дуке Бојаџиев – „До балчак“ (Столе Попов), „Сенки“ (Милчо Манчевски) и „Војната заврши“ (Митко Панов), на програмата се композиции од албумот „Љубовта е патот“, за кој, како што вели Бојаџиев, инспирацијата ја црпел од неговата животна приказна, која се одвива на релацијата Скопје – Њујорк.

Концертот ќе биде спој од класична, филмска, изворна и модерна музика зачинета со љубовна поезија од Мевљана Руми (13 век, суфизам). Со истата програма годинава ќе се претстави и на престижната сцена на „Карнеги хол“ во Њујорк.

Дуке Бојаџиев е македонски пијанист и композитор што веќе 14 години живее и работи во Њујорк. Автор е на филмска, електронска и акустична музика во која може да се почувствува духот на македонската традиција, иако принципите во кои е врамен неговиот музички израз и стил се строго западноевропски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.