Лидерот на ДУИ се сретна со Викторија Нуланд

Лидерот на Демократската унија за интеграција, Али Ахмети денеска во Амбасадата на САД во Скопје се сретна со помошник државниот секретар на САД Викторија Нуланд која престојува во посета на Македонија.

На средбата присуствуваа и заменик помошникот на секретарот за одбрана Евелин Фаркаш и американскиот амбасадор во Македонија, Џес Бејли.

Како што информира партијата, се разговарало за политичката криза во државата и за начините за нејзино надминување, како и за евроатланската интеграција на Македонија преку решавање на прашањето за името и структурните реформи.

Ахмети ја информирал Нуланд за позицијата на ДУИ во врска со политичката криза, за предлозите и иницијативите на партијата за нејзино надминување, како и за следните чекори што планираат да ги преземат во зависност од исходот на разговорите следните денови.

– Претседателот Ахмети го оцени како неприфатливо продолжувањето на политичка криза бидејќи целото општество е во очекување на решение и продолжување на нашиот евроатлантски пат. ДУИ ќе ги поддржи реформите што произлегуваат од препораките на Европската Унија и на г. Прибе бидејќи нивното спроведување го прават демократскиот систем постабилен, се наведува во соопштението од партијата.

Од американска страна е истакнато дека САД останува силен партнер и поддржувач на евроатлантската интеграција на Македонија. Во врска со спорот за името, двајцата соговорници разговарале да продолжат со заедничките напори за наоѓање решение за спорот за името со Грција, веднаш по решавањето на политичката криза.

Соговорниците исто така разговарале и за борците од регионот во војните во Сирија и Ирак, како и за начините да се спречи оваа појава.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.