„Непријателите“ на вашите усни

Кожата на усните е најтенка и не содржи лојни жлезди, па затоа е многу осетливо место, кое лесно може да се надразни. Незгодното пецкање, испуканата и сува кожа на која карминот не изгледа добро и неубавото црвенило што понекогаш се протега и надвор од линиите на усните, се само некои од можните симптоми на иритираната кожа на овој чувствителен дел од лицето.

Меѓу најчестите агресори, кои предизвикуваат иритација, пукање, и лупење на усните, спаѓаат:

Зачинета храна
Верувале или не, храната е можен предизвикувач на испуканите и болни усни. Ако сакате многу зачинета и лута храна, многу е можно со неа несвесно да ги иритирате усните. Тоа не значи дека треба да се откажете од омилената храна, но после ваков оброк, задолжително е да ги измиете усните и да нанесете балсам кој ќе помогне околу нивната нарушена хидролипидна заштитна бариера.

Внатрешна дехидрација
Дехидрацијата на организмот нема да се забележи толку на кожата, но секако ќе се забележи на слузницата на усните. Решението е многу едноставно: консумирајте доволно количество течности, и тоа најмногу вода. На лето треба да пиете и до еден литар вода повеќе од препорачаните 8 чаши на ден, особено ако сте физички активни.

Мат-кармините ги сушат усните
Ако сте личност која сака секојдневно да носи густи мат-кармини, можно е во нив да се крие причината поради која вашите усни се суви. Восочната текстура е дизајнирана така за да не се мрда од усните дури ни кога се бакнувате или јадете, но бидете сигурни дека постојаноста на овие формули има и своја лоша страна. Барем два пати неделно обидете се да ги одморите усните од мат формулите со користење на нешто малку покремасто и похидратантно.

Пастите за заби
Пастите за заби се наменети за темелно миење и дезинфекција на забите, но понекогаш тие се многу агресивни за вашите усни, со кои неминовно имаат контакт за време на миењето. Ако се сомневате дека ова е причината за вашите суви усни, обидете се да ја замените вашата вообичаена паста со таква која не содржи SLS (натриум лаурил сулфат), состојка во производите што служи и за правење пена.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.