Меѓународен натпревар во кореографија „Икс денс“

Младите таленти денеска, 17 јуни, се натпреваруваа во повеќе категории и танцови дисциплини, од класичен балет, до фолклор и модерни танци. Освен учесниците од Македонија, настапија и учесници од Казахстан, Израел, Русија, Летонија, Кореја.

Сања Шутевска, балетски педагог и кореограф, уметнички директор на фестивалот „Икс денс“ вели:

– Овој фестивал го слави танцот во сите негови форми и стилови, од елеганцијата и префинетоста на класичниот балет до енергијата и динамиката на современиот танц. Минатата година организиравме фестивал на завидно ниво. Целта ни е годинешното издание да биде уште подобро и на тој начин оправдано да прераснеме во еден од најдобрите фестивали во регионот – вели Сања Шутевска, балетски педагог и кореограф, уметнички директор на фестивалот „Икс денс“.

Како дел од богатата фестивалска програма на „Икс денс“ ќе се одржат и мастер класови за учесниците, а предвидени се и екскурзии до Вевчани и до Охрид.

Минатата година наградата Гран при ја добија Кореографското студио „Сказка“ од Русија и ДМБУЦ „Илија Николовски Луј“, оддел за современ балет од Македонија за кореографијата „Јас сум“.

Наградите од стручното жири ќе им бидат доделени на најдобрите учесници во четврток, 18 јуни, а потоа ќе следи гала-концерт во Центарот за култура во Струга, на кој ќе настапат најдобрите учесници со впечатливи изведби и кореографии.