Формиран новиот Управен одбор на МКФ

Откако пред дваесетина дена Петар Наумоски беше назначен за нов претседател на Македонската кошаркарска федерација (МКФ), денеска е конституиран новиот управен одбор, а назначен е и првиот оперативец, односно генерален секретар.

Во новиот УО на МКФ, покрај претседателот Наумоски, како и новоизбраните потпретседатели Илија Пенов (менаџерот од „Капилот банка“) и Сашо Дракуловски (брокер), го сочинуваат и: легендарниот поранешен кошаркар, Благоја Георгиевски-Буштур, Сашо Босилков (Орка холдинг), Тони Трајков (Дизајн фантазија), Даниел Воиновски (Еуроимпекс Пежо), Среќко Трајковски (ГИМ), Ристо Јаневски (ОКТА), Горан Ѓорѓиевски (Пекара Специјал), Анатол Кутревски (Пекабеско), Пејчо Илиев-Баџо, Александар Свртинов, претставник од компанијата „Тинекс’’ како и претставници од Здружението на тренери, и Здружението на прволигашите. Наумоски го исполни и ветувањето дадено на изборното собрание, па во новиот УО го кооптира и неговиот противкандидатот Абдураим Бајрактар, кој беше и член на претходниот состав на УО на МКФ.

На првата работна средба, новиот УО го разреши Дејан Лекиќ од функцијата Генерален секретар, а на негово место е назначен поранешниот македонски репрезентативец Дејан Јовановски, кој пред извесен период ја извршуваше и улогата на спортски директор во КК Работнички, , а во МКФ доаѓа од Агенцијата за млади и спорт.

Првиот голем предизвик на Наумоски и неговите соработници, ќе биде регуларно да го приведат домашното првенство кон крај, а веднаш потоа им претстојат активности на меѓународен план, со настапите на повеќе селекции, првенствено машката сениорска која во септември ја очекува настап на завршницата на Европското првенство.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.