Во Македонија не е одобрен, ниту регистриран небезбедниот диететски препарат Health and Beauty Turmeric capsules Extra Strenght кој содржи 2,4 – динитрофенол (DNP), соопшти Агенцијата за храна и ветеринарство.
Контролата е спроведена по известувањето од Интерпол и објавената тревога во 190 земји, вклучително и Македонија, дека на пазарот се продава Health and Beauty Turmeric capsules Extra Strenght од 125 милиграми, најчесто во облик на прав или капсула, а се користи за намалување на телесната тежина.
На домашниот пазар легално се продава препарат со слично име – TURMERIC од 500 милиграми. Според АХВ, станува збор за диететски производ на Health Aid, кој е уредно регистриран и во својот состав не ја содржи спорната супстанца 2,4 – динитрофенол (DNP).
Сличноста со името на овој легално увезен препарат, кој исто како и спорниот најчесто се продава онлајн и има жолта боја, потекнува од куркумата која ја има во неговиот состав.
– Граѓаните да купуваат одобрени диететски препарати од регистрирани оператори кои вршат легален увоз, а особено внимание да обрнат при он лајн продажбите, апелира Агенцијата за храна.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
