Да се украде насмевка од дете чиешто секојдневие се четирите ѕида во болничката соба, многуте апарати, лекарствата и загрижените родители. Да светнат очињата на детенце кое секојдневно гледа болка и солзи во очите на родителите… Нема поголемо богатство, нема човек што би останал имун на насмевката на дете кое се бори со тешка болест. Надежта е таа што нѐ одржува, надежта е таа што последна умира…
Златната рипка остварува желби. Така барем велат. Македонската „Златна рипка“ навистина го прави детскиот сон реалност. Неодамна формираната фондација „Златна рипка“ им подари по една златна рипка на децата на Одделот за онкологија на Клиниката за детски болести во Скопје. Сите деца од 3 до 16 години што боледуваат од тешки болести имаат задача – да ја негуваат златната рипка, да ја хранат, да ѝ ја менуваат водата и секојдневно да ѝ ја кажуваат својата желба.
– „Златна рипка“ е многу млада фондација која има цел да го размрда болното секојдневие на најмладите, на децата кои се лекуваат на Одделот за онкологија на Клиниката за детски болести. Нема друг начин да го пребродат тоа освен со тешки терапии. Потребна им е огромна позитивна мисла, која Фондацијата сака да им ја всади. Сакаме да им всадиме дека ништо не е невозможно. Дури и таа борба со најтешките болести не е невозможна, туку сѐ е остварливо доколку навистина се верува во тоа – вели Неда Китановска, претседателка на Фондацијата „Златна рипка“.
За децата кои секојдневно се со чичковците и со тетките во бели мантили е многу важно да веруваат дека сѐ е остварливо. А, за нив е најважно остварувањето на нивната најголема детска желба. Побудата на позитивното влева надеж. Китановска вели дека нивната задача е да им го размрдаат секојдневието. Желбите се најразлични – запознавање на омилените пејачи, да патуваат некаде, домот да им изгледа како домот на некој лик од приказните и од цртаните филмови… и закрепнувањето е една од желбите.
– Сакаме да исполниме сѐ – некое детенце да посака да отиде на Марс, ќе направиме услови на Земјата да се чувствува како да е на Марс. Планираме да ги оствариме сите желби, секако со помош на компаниите и на други луѓе – додава Китановска.
Да ја вратиме насмевката на Сара
Борбата со тешките болести е непредвидлива. Напорот да се исполни тој детски сон е дополнително компликуван поради медицинската нега. Секое дете мора да добие посебен третман. За да замине некаде, потребно е докторите да оценат и да дозволат дека е погодно време за патување и дека тоа нема да ѝ наштети на здравствената состојба на детето. Потребни се посебни услови за превоз, посебни услови за сместување… Тоа понекогаш знае да ја забави работата. Некогаш болеста знае да биде побрза…
– Желбите се многу ситни. Но, за тие деца тие желби значат живот. Самото исполнување на желбите е тесноповрзано со состојбата на децата. Не во секој момент можеме да го реализираме тоа што е потребно – коментира нашата соговорничка.
Сара е девојче кое е сместено на Клиниката за детски болести во Скопје. Таа има 12 години и боледува од медулобластома. Инспирирана од подводниот свет, сака нејзината детска соба да биде иста како таа во која живее Ариел. „Златна рипка“ сака да ѝ ја направи целата соба како во подводниот свет на Ариел. Сара наскоро ќе го заврши своето лекување и ќе си оди дома, а Фондацијата сака да ѝ докаже дека навистина ништо не е невозможно. Следно исполнување е подводниот свет на Ариел. Тоа ќе ја врати насмевката на Сара, ќе ја врати нејзината надеж, тоа ќе го исполни сонот на детето кое се бори за живот.
Мора да се дејствува брзо за да не биде предоцна. Китановска вели дека Македонците важат за луѓе со големо срце, и тоа постојано го докажуваат. Верува дека компаниите и луѓето ќе помогнат да се оствари уште еден детски сон, по остварувањето на сонот на Мехмед, кој има 4 години и сакаше да вози голем мотор. Голем… до небото!
Мехмед има велосипед во Струга, но сега пораснал и сака да има голем црвен мотор на кој ќе нѐ вози сите нас Но, за да вози голем мотор, потребни му се кацига, ракавици и чизми. Неговата златна рипка се вика Златица, а за неа се грижат тој и неговата баба. Мотоциклистите во Скопје му приредија незаборавен ден на малиот Мехмед, кој боледува од леукемија. Мехмед на картингот кај СРЦ „Борис Трајковски“ стигна со баба си и дедо си, а го пречекаа мотоциклисти од разни мотоклубови и поединци кои се одзваа на хуманиот повик
Црвениот мал мотор, заедно со јакната и со кацигата, стоеше со црвена панделка, а зад него беа наредени мотоциклистите со своите мотори. Тие му помогнаа да ги облече јакната и кацигата, и да го направи првиот круг со моторот. Збунет од големиот број мотори околу него, срамежливо застана до дедо си Хусаин велејќи му дека подоцна повторно ќе се вози. Дедото гледајќи го својот внук како се радува на подарокот, возбудено им се заблагодаруваше на сите што учествуваа во исполнувањето на желбата на Мехмед.
– Направивме убав момент за него, кој сѐ уште го раскажува и сѐ уште буди насмевка на неговото лице. Ние крадеме негова насмевка. Во „Борис Трајковски“ беше прекрасно да се види како на едно дете му светкаат очите поради нешто кое му изгледало невозможно. Голем дел од луѓето на кои им пристапивме со големо срце прифатија да помогнат. Мотоциклистите се големи луѓе со нежно срце. Имаше повеќе од 100 мотоциклисти – вели Китановска.
Потребни се средства и волонтери
Засега „Златна рипка“ работи само со децата од Клиниката за детски болести. Сакаат да им помогнат на триесетина дечиња кои се наоѓаат таму. Китановска посочува дека тоа е првата етапа, а натаму се надеваат дека ќе допрат до сите деца на кои им се потребни.
На неколку начини може да се донира на Фондацијата. Отворени се телефонски броеви (Т-мобиле: 070/143-300; Вип: 077/143-500; OНЕ: 075/143-800), а има и е-платформа на веб-страницата zlatnaripka.mk, каде што можат да помогнат и приватни лица и фирми.
– Отворени сме за партнерство. Соработуваме со волонтери. Потребни ни се волонтери со медицинско искуство, но и луѓе за оперативниот дел – посочува Китановска.
Целото интервју можете да го погледнете на РепубликаТВ.
(Пишува: Билјана Зафирова
Текст објавен во 138. број на неделникот „Република“, 24.04.2015)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
