Амбасадорите во Македонија повикаа на слободни избори

Амбасадорите на Германија, Холандија и на Велика Британија во Република Македонија Гудрун Штајнакер, Мариет Шурман и Кристофер Ивон ги повикаа граѓаните да излезат на избори и слободно да ја изразат својата волја.

Овие избори, смета амбасадорката на Германија Гудрун Штајнакер, се најблиску до граѓаните и во таа насока, како што рече, се надева оти голем број гласачи ќе го искористат своето право и ќе излезат на гласање, бидејќи е многу важно да се практикуваат демократските права.

„Задоволство ни е да ја поддржуваме ’Мост’ не само во набљудувањето, туку и да придонесеме овие избори да ја покажат подготвеноста на демократскиот дух на вашата земја и подготвеноста за влез во ЕУ, за што се надевам дека ќе биде направен некој прогрес оваа година во таа насока“, рече на прес-конференцијата Штајнекер.

Амбасадорката Шурман ги повика сите граѓани утре на локалните избори слободно да се изразат, а сите инволвирани чинители, како што рече, да им овозможат на граѓаните слободно да го остварат своето право на тајно гласање.

Важноста на мирни, спокојни и професионални локални избори ја потенцира и британскиот амбасадор Ивон, кој изрази надеж дека утре граѓаните ќе го искористат правото на глас.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.