Договор за полициска соработка меѓу Македонија и Словенија

Министерката за внатрешни работи Гордана Јанкулоска во Будва, Црна Гора во пресрет на денешната Конференција на министри за правда и внатрешни работи и партнерите на Брдо процесот и Процесот за соработка во ЈИЕ,оствари билатерална средба со министерката за внатрешни работи  на Република Словенија Весна Гјеркеш Жнидар, на која беше потпишан Договорот меѓу Владите на Република Македонија и Република Словенија за полициска соработка.

Со склучување на Договорот за полициска соработка, двете министерства за внатрешни работи дополнително ја зацврстуваат соработката во однос на спречување на опасност и осигурување јавна безбедност, во поглед на јавниот ред и сообраќајната безбедност. Како што денеска соопшти МВР, соработката дополнително ќе се зацврсти и за спречување, откривање и спроведување на истраги за кривични дела, специфично во полето на организиран криминал, тероризам, трговија со луѓе и нелегална миграција, компјутерски криминал, незаконска трговија со недозволени дроги, психотропни супстанци и прекурсори, како и други кривични дела од меѓународен карактер, особено потврдувајќи ги заедничките заложби за борба против тероризмот во пресрет на денешната Конференција на министрите за правда и внатрешни работи и партнерите на Брдо процесот и Процесот за соработка во ЈИЕ.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.