Почина и обвинителот кој беше држен како заложник

Турскиот обвинителот Мехмет Селим Кираз им подлегнал на повредите со кои се здобил во акцијата за негово ослободување, пренесува „Си-Ен-Ен“. Кираз денеска беше држен како заложник од страна на левичарската група Револуционерна партија и фронт за народно ослободување (ДХКП-С).

Во акцијата за ослободување на обвинителот убиени се двајцата киднапери, а Кираз бил повреден. Медиумите истакнуваат дека Кираз бил брзо префрлен во болница и лекарите се бореле за неговиот живот, но сепак не успеале да го спасат. Дел од турските медиуми, меѓутоа, тврдат дека обвинителот бил мртов кога го донеле во болницата.

Руската агенција Спутник пишува дека Кираз бил погоден со еден куршум во главата и два куршуми во телото.

Кираз го истражуваше убиството на 15-годиниот Беркин Елван, кој почина минатата година во март, откако 260 денови беше во кома по здобиените повреди во судири со полицијата за време на протестите во паркот Газа. Двајца членови на ДХКП-С неколку часа го држеа во заложништво. Тие се заканија дека ќе го убијат Кираз доколку полицаецот осомничен за убиството на Елван јавно пред телевизија не го признае стореното дело.

ДХКП-С е прогласена за терористичка од Турција, ЕУ и САД, откако презеде одговорност за серија убиства и бомбашки напади во Турција во 70-те години од минатиот век

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.