ЕК нема да прати експерти во обвинителството

Европската Комисија во моментов нема да врши надворешната експертиза во содржината на која било поединечна  кривична постапка. Ова, како што информира Јавното обвинителство на Република Македонија, е наведено во одговорот од Европската комисија на барањето за испраќање меѓународни експерти кои би биле во тек со предметите кои ги води обвинителството, а произлезени од последните актуелни случувања.

Во дописот, како што соопштуваат, е истакнато дека единствено надлежно тело да ја цени објективноста или транспарентноста на активностите на јавните обвинители е судот од прва инстанца ( и во случај на жалба апелациониот суд).

– Јавното обвинителство ја искажува својата отвореност и покана за меѓународни експерти од ЕУ. Ценејќи ги домашните закони и европските стандарди, а во насока на намалување на сомневањата во јавноста, Јавното обвинителство и натаму ќе продолжи со транспарентноста и подготвеноста за соработка со сите релевантни фактори, наведува во соопштението.

Оттаму наведуваат дека Јавното обвинителство иако има капацитет и единствена законска недлежност за водење на истражна постапка, сепак ја поканија Европската Комисија преку свои претставници, а во интерес на јавноста и заради намалување на сомнежите за објективноста во постапувањето, да сведочи за транспарентноста и објективноста во работата на јавните обвинители.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.