Скопјани да внимаваат каков отпад фрлаат во пластичните контејнери

ЈП „Комунална хигиена“-Скопје информира дека во последниот период има појава на опожарување на новите пластични контејнери од страна на граѓаните, кои во нив исфрлаат запалени предмети и материи, како што е недоизгасната жар од скара, отпушоци од цигари и слично и бара од граѓаните да внимаваат каков отпад положуваат.

– Би сакале да апелираме повеќе да не се исфрлаат вжарени и недоизгаснати предмети и материи и во никој случај намерно да не се опожаруваат контејнерите, бидејќи во спротивно ЈП „Комунална хигиена“-Скопје ќе поднесе пријава до полицијата и соодветните инспекциски служби и ќе бидат преземени строги санкции за сторителите. Истовремено, ги охрабруваме граѓаните коишто ќе забележат ваква појава, истото да го пријават на дежурниот телефон на ЈП „Комунална хигиена“-Скопје: 3216 644, велат од јавното претпријатие.

На овој начин, додаваат, се прави огромна штета за Претпријатието, но пред сѐ за граѓаните, од чиишто средства се набавуваат садовите за отпад.

Со намера да ја подобри хигиената во градот Скопје, ЈП „Комунална хигиена“-Скопје во текот на изминатата година започна етапно да ги менува старите дотраени метални контејнери со нови пластични контејнери со зафатнина од 1,1 кубни метри.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.