НАТО: Договорот на Русија со Јужна Осетија го крши меѓународното право

Новиот руски договор со Јужна Осетија, отцепениот регион од Грузија, го крши меѓународното право и ги отежнува напорите за јакнење на регионалната безбедност, изјави денеска генералниот секретар на НАТО, Јенс Столтенберг.

Рускиот претседател Владимир Путин и неговиот колега од Јужна Осетија Леонид Тибилов денеска во Кремљ потпишаа Договор за сојузнички односи и интеграција.

Столтенберг оцени дека договорот „го крши грузискиот суверенитет и територијалниот интегритет и е во спротивност на принципите на меѓународното право, принципите на ОБСЕ и на руските меѓународни обврски“.

– Овој така наречен договор е уште еден чекор на Руската Федерација, која ги отежнува тековните напори на меѓународната заедница за јакнење на безбедноста и стабилноста во регионот, се наведува во соопштението од кабинетот на Столтенберг, при што се додава дека НАТО не го признава договорот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.