Шведскиот премиер Стефан Ловен денеска ќе ја почне својата работна посета на главниот град на Украина, Киев. На агендата се предвидени потпишување билатерален договор за финансиска поддршка и разговори со украинскиот државен врв, јави дописникот на МИА од Гетеборг.
Премиерот Ловен ќе го посети Киев на шведска иницијатива, а освен разговорите со украинскиот претседател Петро Порошенко и со премиерот Арсениј Јацењук, ќе има средба и со лидерот на кримските Татари – средба со која ќе биде потенцирано дека Шведска не ја прифаќа руската анексија на Крим.
Со билатерланата спогодба што ќе биде потпишана во Киев, Шведска ќе и понуди помош на Украина во спроведувањето на реформските зафати.
Но, најголемиот дел од разговорите ќе биде посветен на ситуацијата во источна Украина и за тоа што се бара од членките на ЕУ за зголемување на притисокот врз Русија за почитување на договорот за прекин на огнот.
Идната недела ќе се одржи средба на шефовите на држави или влади во Европскиот совет, при што ќе бидат разгледани актуелните состојби во конфликтот меѓу Русија и Украина. Притоа шведскиот премиер ќе ги презентира заклучоците од денешните разговори во Киев.
И покрај извесни спротивставени гледишта ЕУ досега истапува со заеднички ставови кога станува збпор за санкциите против Русија, пишува „Дагенс нихетер“.
Шведска смета дека санкциите треба да продолжат сѐ додека не стане јасно дека се присутни конкретни знаци на подобрување на ситуацијата во источна Украина. Официјален Стокхолм, исто така, смета дека членките на ЕУ треба да бидат подготвени и за зголемување на притисокот врз Русија со дополнителни санкции.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
