Санкции: Николиќ бил пронајден мртов во тоалетот

Четириесет и двегодишниот Никола Николиќ, сопственик на „Фиком“, утрово во 6 и 30 часот е најден обесен во штипскиот затвор, каде што издржуваше казна затвор во траење од 25 години и 2 месеца за „измама“.

– Осуденото лице Никола Николиќ од Скопје, на возраст од 42 години, осуден со повеќе пресуди на Основен суд Скопје 1 Скопје  за сторени кривични дела „измама“ по член 247 ст.4 од Кривичниот законик на Република Македонија на казна затвор во траење од 25 години и 2 месеца. Против осудениот Никола Николиќ се води и нова кривична постапка пред Основниот суд Скопје 1- Скопје, стои во соопштението од Управата за извршување на санкциите.

Казната затвор, како што се додава, почнал да ја издржува на 5.9.2006 година, а му завршувала на 15.11.2031 година.

За време на престојот во Казнено-поправниот дом Штип, каде што ја издржувал казната затвор, осудениот Никола Николиќ не покажувал знаци на психички заболувања, нема користено антидепресивна терапија и не боледувал од никакви хронични болести.

„Денеска, во 6 и 30 часот, осуденото лице Никола Николиќ од страна на други осудени лица било пронајдено мртво во тоалетот во крилото каде што престојувало. Одговорните  надзорници на смена веднаш се упатиле во просторијата, каде што осудениот Никола Николиќ го затекле со јаже (манила) околу вратот“, стои во соопштението.

Од Управата за извршување на санкциите велат дека веднаш била повикана Итната медицинска помош, при што од страна на лекарите била констатирана смрт. За настанот се известени надлежните органи, а на самото место присуствуваа судија на претходна постапка и јавен обвинител, кои извршиле увид на самото место.

Николиќ беше затворен поради продавање исти станови од зграда во скопската населба Кисела Вода на повеќе граѓани. 

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.