Средба Груевски- Холгер: ЕБОР во поддршка на приватниот сектор

Во рамките на економската посета на Лондон, Велика Британија, премиерот Никола Груевски се сретна со регионалниот директор на Европската банка за обнова и развој, Муант Холгер. Тема на средбата беа развојот на односите со ЕБОР, како и соработката за реализација на проекти од сферата на енергетиката, инфраструктурата во делот на изградба на патишта и железничкото поврзување, проекти во функција на напредокот на економијата и економските односи.

Премиерот Груевски ја истакна одличната соработка на Македонија со ЕБОР.

-Имаме повеќе заеднички проекти и во јавниот сектор, но тие се присутни и во приватниот сектор, и имаат намера да го засилат своето учество со повеќе средства и поволни можности за кредитирање. Јас ги охрабрувам ваквите нивни чекори и намери на поддршка на приватниот сектор. Во однос на јавниот сектор веќе се во тек неколку значајни проекти и разговаравме за повеќе нови проекти. Некои поминаа на Бордот на директори, или треба да се усвојат, а некои се уште се во фаза на договарање. Ние ќе продолжиме со разговорите со цел исполнување на плановите- изјави премиерот Груевски.

Регионалниот директор на ЕБОР, Муант Холгер изрази задоволство од соработката со Република Македонија.

-Имавме многу продуктивен состанок со премиерот и претставниците на Владата, разговаравме за повеќе проекти кои се од заедничко значење. Главниот фокус беше поддршка на приватниот сектор и компаниите, разменувајќи идеи и информации за тоа како може дополнително да го засилиме. Во наредните неколку недели ќе ја посетам државата со цел да ги продолжиме разговорите со владините претставници за реализацијата на повеќе значајни проекти- посочи Холгер.

Премиерот Груевски и владината делегација која ја предводи ќе се обрати на бизнис форум во Лондон каде ќе ги престави инвестициските можности на Република Македонија пред повеќе потенцијални инвеститори. Лондон преставува значаен трговски и економски центар каде се присутни повеќе глобални корпорации и бизнис компании.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.