Наместо идејата за генерален штрајк, која е иницирана од тесното раководство на СОНК заради задоволување на лични амбиции и цели преку задржување на сегашните функции, синдикалните организации од регионов ја поддржуваат идејата за социјалниот дијалог низ кој и досега сме функционирале.
Ова го истакна Дарко Крстески, претседател на Синдикатот на ОУ „Христо Узунов“ од Другово, кој ги претставува просветните работници од тој регион.
-Со дијалог сме дискутирале и решавале бројни ситуации со извршната власт, во корист на сите просветни работници, а не во корист на мала група луѓе. Не велам дека состојбата во моментов е перфектна кога е во прашање статутот на просветните работници. Но, членството на нашиот синдикален разгранок одлучи дека воопшто не е моментот да се организира штрајк за кој во јавноста се појавија бројни тези и тврдења околу вистинската негова намера и кои полека се потврдуваат – истакна Крстески.
Членовите на најголемите синдикални организации и одговорни просветни работници, во чијшто фокус секогаш се децата, велат дека нема да дозволат да трпи едукативниот и воспитно-образовен процес на 280.000 ученици.
Крстески вели дека децата и нивните семејства, во случај на голем штрајк, ќе бидат заложници на идејата на еден човек.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
