Собранието на Република Македонија денеска расправаа за потребата за носење на законот за измените и дополнувањата на Законот за биомедицинско потпомогнато ополодување, со кои се предвидува можност за сурогат мајчинство.
Министерот за здравство Никола Тодоров истакна дека треба да им се помогне на семејствата што немаат деца и оти сурогат мајчинството може да биде единствен излез од ситуација на невозможност да се има свое генетски поврзано дете кога жената не може да ја издржи бременоста.
– Токму поради тоа намерата на сурогат мајката е да го замени тој процес само во периодот на бременост, рече Тодоров.
Сурогат мајка може да биде жена на возраст од 25 до 50 години, која е мајка на најмалку едно дете и психофизички здрава. Законот предвидува сурогат мајката да добие само пари за основните трошоци, а се забранети и казниви со закон исплаќањето на финансиски средства, како и на подароци повисоки од 100 евра, појасни Тодоров.
– Предвидуваме и кривично дело според кое ќе се казни со закон од шест месеци до пет години секој кој ќе бара или земе односно понуди или даде паричен надоместок, хартии од вредност, недвижен или подвижен имот, злато или друга материјална корист како надоместок, изјави министерот Тодоров.
Меѓу другото се предвидува и заштита на идентитетот на сурогат мајката, родителите и детето. Казни ќе има и за оние кои ќе ги изнесат нивните податоци во јавност.
Сурогат мајка може да се биде само еднаш. – Со ова сакаме да не оставиме каква било можност за каков било бизнис. Може да роди само едно дете за кого било, рече Тодоров.
Со законските измени се предвидуваат и условите под кои брачен пар може да поднесе барање за сурогат мајчинство.
Пратениците го поддржуваат сурогат мајчинството, посочувајќи дека тоа ќе помогне семејствата кои не можат да имаат свои деца, како и за зголемување на наталитетот.
Претходно пратениците ја констатираа потребата за донесување на измените на законите за прекинување на бременоста, за санитарната и здравствената инспекција, за јавно здравје, за безбедност во снабдувањето со крв, за медицинските студии и континуираното стручно усовршување на докторите на медицина и за земање и пресадување на делови од човечкото тело заради лекување. Овие измени, како што појасни министерот Тодоров, се во однос на преднесување на надлежности од Министерството за здравство на Државниот здравствен и санитарен инспекторат во согласнот за Законот за инспекциски совет.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
