За разлика од Косово, нема радикализација на исламот во Албанија

Во Албанија не постои значителна радикализација на исламската младина, но ситуацијата е поинаква во Косово и во Босна и Херцеговина каде што е поголемо влијанието на исламските екстремисти, објави денеска австриската агенција АПА.

Оваа агенција наведува дека иако австрискиот контингент во редовите на КФОР тврди дека не забележува никаква радикализација во Косово, неодамна се уапсени 40 муџахедини и се проценува дека околу 200 Косовци во моментот се во редовите на Исламската држава (ИД), пренесува „Танјуг“.

Австриската агенција го цитира игуменот на манастирот Дечани, Сава Јањиќ, кој тврди дека исламот во Косово е умерен, но дека влијанието на вахабистите е силно.

Тој опасност од радикализација гледа и во Санџак и во Македонија.

Римокатоличкиот бискуп во Тирана, Рок Кола Мердита не гледа опасност од исламизација.

– Во Албанија владеат толеранција и хармонија – тврди тој, додавајќи дека постојат млади што биле изложени на „перење мозок“, но нивниот број не е голем.

Така муслиманите од Велика Британија изградија џамија, која не е призната од албанските исламски надлежни власти. Многу млади Албанци студират со исламски земји, основана е екстремистичка клетка но тукашните власти се многу внимателни, наведува бискупот.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.