Иванов во Прага ќе прими награда за демократија

Претставници на американскиот Институт за политички и економски системи, денеска, на македонскиот претседател Ѓорге Иванов ќе му ја врачат наградата за демократија и пазарна економија. Свечената церемонија ќе се одржи на Карловиот универзитет во Прага.

– На Иванов му се доделува наградата поради неговите достигнувања во промовирањето на економската слобода, намалувањето на даночните стапки и невработеноста, зголемувањето на транспарентноста и подобрувањето на јавното образование, се вели во образложението.

Фондот за американски студии од Вашингтон е формиран во 1967 со цел да развива студенски програми за САД, Европа, Јужна Америка, Азија и Блискиот Исток во областа на слободата и слободната економија.

Оваа престижна награда се доделува на лидери од Југоисточна Европа кои придонесуваат за слободата и слободните економски пазари во светот.

Меѓу добитниците на оваа награда што се доделува од 1994, се поранешниот претседател на Чешка Вацлав Клаус, поранешниот полски и поранешниот српски претседател Лех Валенса и Борис Тадиќ, како и експремиерите на Србија, Словенија, Хрватска и Унгарија, Зоран Ѓинѓиќ, Јанез Дрновшек, Иво Санадер и Виктор Орбан.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.