Очекувано, „Фолксваген“ еволуираше во дизајнот со тоа што новиот модел, за разлика од претходните генерации, доби изразен спортски дизајн и детали.
Автомобилот доби компактност со новите димензии, кои го прават за 2 милиметри пократок, за 12 милиметри поширок и за 6 милиметри понизок од претходникот, што му дава и агресивен изглед.
Инженерите од „Фолксваген“, комбинирајќи челик во висока цврстина и алуминиумска легура, успеаја да ја намалат тежината за 85 килограми и сега новиот „пасат“ тежи само 1.312 килограми.
Внатрешноста на автомобилот е попространа благодарејќи на тоа што меѓуоскиното растојание е зголемено за 79 милиметри и сега изнесува 2.791 милиметри. Таа промена може да се почувствува и во возните перформанси, при што се добива уште постабилен и поголем автомобил, а патниците добиваат повеќе место за нозете, главата и за рамената.
Новиот „пасат Б8“ има задни светилки со ЛЕД, додека, пак, може да се добие и комплетно нова група предни светилки со ЛЕД и со динамичен светлосен систем кој го мести предниот сноп без да им пречи на возачите што доаѓаат од спротивен правец.
Багажниот простор е зголемен за 21 литар и сега изнесува 586 литри, а караванската верзија има фантастични 650 литри во основната верзија и 1.780 литри со преклопени задни седишта.
Богатата гама од мотори се состои од шест агрегати што имаат бензински погон и погон на дизел-гориво, како и хибриден модел кој е комбинација на бензин и на електрична енергија.
Бензинските мотори се со зафатнина од 1,4, 1,8 и 2 литри и со моќност од 150 до 280 коњски сили. Дизел-моторите се од 1,6 и од 2 литри, и со 120, 150, 190 и 240 коњски сили.
Хибридот е комбинација од 1,4-литарски бензински мотор и електричен мотор кој има моќност од 211 коњски сили.
Новиот „пасат“, наместо традиционалната аналогна контролна табла, доби дигитален екран со 12,3 инчи, кој веќе е вграден во „ауди ТТ“.
Новиот „пасат Б8“ може да се нарача од 10 јули, а од „Фолксваген“ најавија дека цената за основниот модел се движи од 26.000 евра.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
