Во Хрватска усвоен закон за истополови бракови

Хрватска денеска доби Закон за животно партнерство на лица од ист пол, согласно кој хомосексуалните двојки ќе ги уживаат истите права, како и брачните партнери, освен правото на посвојување дете.

Саборот го усвои Законот со 89 гласови „за“ и 16 „против“. Усвојувањето беше проследено со аплауз од галеријата, од каде седницата ја следеа активисти за права на ЛГТБ лицата.

По усвојувањето на Законот, во Хрватска бракот, вонбрачната заедница, животното партнерство и неформалното животно партнерство законски се признати како заедници, кои го претставуваат семејниот живот, соопшти здружението Загреб Прајд и наведе дека семејниот живот на истополовите партнери отсега во Хрватска е заштитен со Уставот, Европската конвенција за човекови права и Уставниот суд.

Законот ќе стапи во сила осмиот ден од објавување во Службен весник, а првата истополова венчавка, според проценките на Здружението, ќе може да се одржи кон средината на август.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.