Владата распиша оглас за околу 379 раководни позиции

Владата распиша оглас за ангажирање на околу 379  лица за раководни позиции во државната управа и за членови во управните и надзорните одбори.

Огласот се однесува за 159 раководни позиции во државната управа меѓу кои пет амабасадорски места, осум воени аташеа, 15 позиции на државни секретари во министерствата, над 20 директорски места на централни и државни органи, како и дваесетина позиции на директори на научни установи. Покрај ова распишан е и оглас за над 220 членови на управни и надзорни одбори во државни агенции, јавни претпријатија, клиники и тн.

Владиниот портпарол Александар Ѓорѓиев денеска на прес-конференција иформираше дека огласот е веќе објавен во дневните весници и ќе трае до 30 јуни.

– Ова е најголем оглас кој било кога е распишан за обезбедување на интерес на лица за ангажирање на раководни позиции. Огласот не е законска обврска на Владата, но нашата цел е да обезбедиме една мобилизација која ќе резултира со нов квалитет што ќе биде внесен од страна на лицата кои ќе се пријават и кои ќе имаат можност да раководзат со определени институции -потенцира Ѓорѓиев.

Тој нагласи дека при изборот  нема да има никаков вид на протекционизам и оти сите кандидати ќе имаат еднакви шанси.

– Сите лица кои ќе се обидат да извршат влијание кое ќе води до некаков протекционизам, нема да бидат толерирани и тоа ќе се смета за негативна карактеристика. Наша цел е да се ангажираат лица врз основа на нивните знаења и професионалното искуство – нагласи Ѓорѓиев.

Огласот се однесува за позиции кои веќе се испразнети  и за места чиј мандат на сегашните раководни лица истекува во текот на годинава или на следните две години.

Подетални информации за аплицирањето на огласот можат да се најдат на веб страницата на Владата на Република Македонија –http://www.vlada.mk/konkursi/

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.