Гордоста на Израел, Макаби ја покори Европа

Спортската гордост на Израел, Макаби Тел Авив, ја покори Европа и по шести пат е кошаркарски шампион на стариот континент. Вечерва во финалето на Евролигата, Макаби го изненади Реал Мадрид и со победа од 98-86 стаса до неочекуван триумф и нова круна.

Мечот беше одлучен дури по петминутно продолжение, откако во регуларниот дел беше нерешено 73-73. Во дополнителното време блескаше Тајрис Рајс со неверојатни 14 поени и серија од тројки, што го урна кралот од Мадрид, иако Реал беше апсолутен фаворит за титулата.

Рајс го заврши мечот со 26 поени и ја заслужи наградата за најкорисен играч во финалето на Евролигата. Макаби и во полуфиналето покажа цврст карактер, надомести негатива од 15 поени и ја елиминира фаворизираната ЦСКА од Москва, а меч-винер повторно беше Рајс со победнички кош на 5 секунди до крајот.

Во предигра на финалето, Барселона ја победи ЦСКА со 93-78 и го освои третото место на финалниот турнир во Милано.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.