Паркот на ветерни централи во Богданци влегува во својата финална фаза од изградбата. На терен веќе се подигнати и се целосно комплетирани сите 16 ветерници, а во моментов течат активностите за поврзување на ветерниот парк со електропреносната мрежа на МЕПСО.
Поради приклучување на паркот на ветернице во Богданци во дистрибутивната мрежа утрово од 5 до 7 часот без електрична енергија беа населените места во општините Гевгелија, Валандово, Дојран и Богданци. Работата е веќе завршена и во четирите општини има нормално снабдување со електрична енергија.
Следува период за тестирање на карактеристиките на комплетната техничка опрема по што капацитетот ќе влезе во редовно производство.
Веќе е целосно завршена изведбатата на потребната инфаструктура и придружни објекти за ветерниот парк, изградена е патната инфраструктура, приклучени се далноводот, командната зграда и 20/110-киловолтната трафостаница. Останува да се реализира асфалтирањето на пристапниот пат и активностите за хортикултурно уредување на просторот околу ветерниците.
ПВЕ „Богданци“ со 16 ветерници распространети на 29 хектари се очекува да испорачува најмалку 100 гигават-часови природно одржлива енергија, што на годишно ниво е доволно за снабдување на домаќинствата на 60.000 граѓани. Истовремено тие ќе ја зголемат инстралирана моќност на ЕЛЕМ за 36,8 мегавати, како и учеството на обновливите извори во нејзиното производството.
Во ветерниот парк се вградени турбини, производство на „Сименс“ од Данска, кои се меѓу најдобрите во својата класа. Инсталираната моќност на секоја од нив е 2,3 мегавати, висината на столбот изнесува 84 метри, а дијаметарот на елисата е 93 метри.
Реализицијата на овој проект чини 55,5 милиони евра, од кои 47,9 милиони евра се заем од Владата на Сојузна Република Германија преку КФВ банката, додека 7,6 милиони евра обезбеди ЕЛЕМ од сопствени средства.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
