Венизелос ја почна турнејата, в четврток во Македонија

Грчкиот вицепремиер и шеф на дипломатијата, Евангелос Венизелос, во својство на претседавач со Советот на ЕУ ја почнува турнејата во земјите од Западен Балкан. Во четврток се очекува да ја посети и Македонија каде што се планирани средби со државниот и политичкиот врв во земјата.

Грчкиот министер турнејата ја почнува во Белград, од каде по средбите со српскиот претседател Томислав Николиќ, премиерот Ивица Дачиќ, вицепремиерот Александар Вучиќ и шефот на српската дипломатија Иван Мркиќ, ќе продолжи за Подгорица, Црна Гора.

Во вторник Венизелос посетата ја продолжува со посета на Босна и Херцеговина, а истиот ден ќе го посети и Косово, каде ќе се сретне со косовскиот премиер Хашим Тачи и шефот на косовската дипломатија Енвер Хоџај.

Според агендата, среда вечерта Венизелос од Приштина патува за Македонија, каде в четврток прво ќе оствари средба со претседателот Ѓорге Иванов, а потоа и со премиерот Никола Груевски. Венизелос ќе има и средби со вицепремиерот за евроинтеграции Фатмир Бесими, шефот на дипломатијата Никола Попоски, претседателот на ДУИ Али Ахмети и лидерот на СДСМ Зоран Заев.

Според информациите од грчкото Министерство за надворешни работи, Венизелос потоа се враќа во Приштина, и потоа заминува за Тирана каде што ќе оствари средба со албанскиот премиер Еди Рама, претседателот Бујар Нишани и претседателот на Парламентот Илир Мета.

Од грчкото МНР не е наведено на кои теми Венизелос ќе разговара со своите домаќини, а се очекува фокусот да биде ставен на грчкото претседателство со ЕУ и на процесот на проширувањето на Унијата, кој иако Грција не го назначи како приоритет за време на своето претседавање, сепак неколку пати досега порача дека ќе им даде поддршка на земјите од Западен Балкан во европскиот пат.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.