Македонија и Албанија со уметност ќе лечат зависници

Уметноста ставена во функција на ранливата категорија на граѓани. Проектот под наслов „Употреба на уметноста каде што е тешко да се зборува – Размени меѓу уметници кои работат во социјалната област” има за цел да ја поттикне уметноста и креативноста кај оние луѓе кои скршнале од вистинскиот пат. Културниот центар „Медиа Артес“ од Охрид и албанската асоцијацијата „Рефракшн“ една година ќе го спроведуваат овој проект кој е финансиран од ИПА програмата на Европската Унија за прекугранична соработка помеѓу Македонија и Албанија. Со него се опфатени општините Охрид и Струга од Македонска страна и Корча, Поградец и Бибер, од Албанска страна.

-Генералната цел на проектот е да создаде мрежа од граѓански организации од областа на културата, локални институции, формални и неформални групи на уметници базирани во овие општини и индивидуални уметници кои би сакале да работат со ранливи групи, истакна Билаловиќ на денешната прес-конференција.

Со овој проект ќе им се помага на младите луѓе кои биле вклучени во криминал, насилство, или живеат во некој тип на изолација, зависност, страдаат од родова нееднаквост или се соочуваат со некој вид конфликти. Со нив ќе работат културните организации, уметниците, студентите и психосоцијалните експерти од Македонија и Албанија кои од шведски експерти ќе се обучени директно да го применат своето знаење во локалните активности со ранливите групи.

-Во моментов сме во комуникација со различни социјални установи кои работат со ранливи групи и го мапираме теренот, односно правиме еден вид проценка на потребите на ранливите групи во Охрид и Струга. Ќе се организираат посети на размена помеѓу уметниците од Македонија и Албанија. Уметници од Албанија ќе доаѓаат овде и ќе ги посетуваат пилот активностите во Македонија, и обратно. Исто така, во проектот ќе биде промовиран и веб-сајт на проектот преку којшто ќе се разменуваат информации, појасни Билаловиќ.

Инаку, зa македонските партнери од буџетот на проектот се издвоени 58.360 евра. Осумдесет и пет проценти од финансиските средства се обезбедени од Европската Унија , а останатите 15 проценти ги покрива Владата на Република Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.