Може да се легализира земјиште по едно евро квадрат и без донесен ДУП

Оние граѓаните кои имаат нелегализирано земјиште под нивните легализирани куќи да можат да го откупат по едно евро за метар квадратен без притоа да е донесен ДУП-от за местото во кое живеат.

Ова го изјави премиерот Никола Груевски додавајќи дека е една од најзначајните одредби од предложените измени на Законот за градба.

“Досега тие можеа да го купат земјиштето само ако има донесено детален урбанистички план. Сега со измените се овозможува иако таков план не е донесен, а граѓаните имаат легализирана куќа, да можат земјиштето под куќата да го легализираат, односно откупат по цена од евро за метар квадратен”, изјави премиерот по пуштањето во употреба на современа лабораторија за хемиски и физички испитувања на културното наследство.

Тој истакна дека измените се донесени поради тоа што на многу места во Македонија, особено во руралните средини нема донесено урбанистички планови.

“Тие се скапи за носење, претставуваат товар за општината. Веројатно ќе бидат донесени во некоја фаза, но не секогаш тоа може да се направи во време кога луѓето имаат можност да го легализираат земјиштето”, истакна Груевски.

Премиерот потенцираше дека со измените за првпат се воведува електронско издавање на градежна дозвола не само за нова градба, туку и за доградба и за реновирање на постојна градба.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.