Претседателот на Русија, Владимир Путин, истакна дека едвај чека за четири години да биде домаќин на најдобрите фудбалски репрезентации во светот.
Тој изјави дека Светското првенство во Русија во 2018 година ќе биде незаборавен фудбалски празник.
– Ќе направиме сѐ што можеме за настанот да го организираме на највисоко ниво. Ќе се потрудиме на светот да му претставиме незаборавен фудбалски празник и оригинално руско гостопримство – изјави Путин.
Владимир Путин беше присутен на финалето на Светското првенство во Бразил како претставник на државата што ќе биде домаќин на следното првенство.
– Успешно ги организиравме Зимските олимписки игри во Сочи оваа година и точно знаеме каков е предизвикот да се органзира спортски настан од ваков обем – додаде Путин.
Следното Светско првенство ќе се игра во Русија од 8 јуни до 8 јули и ќе биде организирано во 11 града низ земјата.
