Колумбискиот легендарен голман Фарид Мондрагон влезе во историјата на светските првенства како најстар играч кој излегол на зелениот терен. Тој пред три дена наполни 43 години и го помина на листата камерунецот Роже Мила кој изигра натпревар за својата репрезентација со 42 години и 39 дена.
Честа да настапи во последните пет минути на вчерашниот натпревар против Јапонија му ја укажа селекторот Хозе Пакерман откако натпреварот практично беше решен при водство на Колумбија од 3-1.
Ветеранот имаше една успешна интервенција, а посебно се израдува на голот на Џејмс Родригез за конечен резултат од 4-1.
– Многу сум му благодарен на селекторот што веруваше во мене и ме однесе на светското првенство. Да не беше тој уште пред две години ќе ја завршев кариерата. Ова е најубавиот поклон за мојот 43 роденден – изјави Мондрагон по натпреварот.
