Белгија со многу мака ја оправда фаворитската улога против Алжир и ги скроти популарните „Пустински лисици“ со победа од 2-1. Еден од потенцијалните кандидати за титулата губеше по првиот дел со 0-1, по погодокот на Стефан Фегули од пенал во 25. минута.
Алжирците предводени од легендарниот Вахид Халилхоџиќ одиграа тактички одлично во првиот дел, но не издржаа докрај. Белгија која важи за можно изненадување на шампионатот во Бразил притисна во вториот дел, а за десет минути успеа и да направи комплетен пресврт.
Во 70. минута Маруане Фелаини израмни со удар со глава, а во 80. минута Дирк Мертенс кој влезе во игра во вториот дел со гол ја круниса извонредната контра на Белгијците. Ова беше првиот меч од Х групата и претпоследен од првото коло на мундијалот. Ноќеска точно на полноќ Русија и Јужна Кореа го затвораат првиот круг, а пред нив од 21 часот во меч од второто коло во А групата домаќинот Бразил игра со Мексико.
