Бразилски напад со извонредното трио Пеле, Роналдо и Ромарио го предводи идеалниот тим на сите времиња на фудбалските мундијали во изборот на шпанскиот весник „Марка“.
Во најдобриот состав има четворица Бразилци, двајца шпански репрезентативци и по еден фудбалер од Германија, Франција, Холандија, Аргентина и Италија.
Најдобар голман според читателите на „Марка“ е Икер Касилјас пред легендарниот руски чувар на мрежата Лав Јашин. Десен бек е Паоло Малдини, во средината е извонредниот Кајзер, Франц Бекенбауер, а левата бочна позиција е загарантирана за Роберто Карлос. Шпанија на голот, потоа Италија, Германија и Бразил во дефанзивната линија. Веројатно имаше место и за Јашин и Буфон на голот, потоа и за Пујол, Ширеа и уште дузина извонредни одбранбени играчи, но и ваквиот состав на дефанзивниот дел е извонреден.
Во средниот ред се вклучени Иниеста, Зидан, Марадона и Кројф, а во нападот е бразилскиот трилинг Пеле, Роналдо и Ромарио. Најмногу гласови поединечно доби „кариоката“ Роналдо, околу 138 илјади посетители на сајтот на „Марка“ гласаа за најдобриот стрелец на мундијалите.
Еве го идеалниот тим на „Марка“ во формација 3-4-3:
Касилјас (Шпанија)
Малдини (Италија), Бекенбауер (Германија), Карлос (Бразил)
Иниеста (Шпанија), Зидан (Франција), Марадона (Аргентина), Кројф (Холандија)
Пеле (Бразил), Роналдо (Бразил), Ромарио (Бразил).
