Аргентинските медиуми им честитаа на Германците за победата со доза на горчина поради спорната одлука на судијата Никола Риколи кој не досуди пенал за гаучосите во една спорна ситуација.
– Медал на честа, Германија и судијата ја урнаа илузијата на Аргентина, пишува Хронија која го анализираше бруталниот старт на германскиот голман Мануел Ноер над Гонзалез Игуаин на работ на шестнаесетникот. Италијанецот Риколи сепак сметаше дека станува збор за контра фаул и топката ја додели на Германците.
Денешното издание на Ла Насион е со наслов „Аргентина загуби 1-0 чувствувајќи во срцето дека беше толку блиску“. „Оле“ го цитираше селекторот Алехандро Сабељо кој им рекол на играчите „Можете да ме погледнете во очи“, весникот Кларин пак пишува „Сонот е срушен со гол во продолженија“.
