Повеќето експерти од оваа област велат дека водењето љубов пред натпреварите претежно им помага на спортистите и не влијае негативно врз психофизичката подготвеност, а имаше интересни правила, од потполна забрана за четири репрезентации, полна сексуална слобода за повеќето од нив, до симпатични комбинации, како што се примерот со Бразил, Франција, Костарика и со Нигерија
На јубилејното, 20. издание на Светското првенство во Бразил заврши првата фаза по групи и веќе се познати сите патници во осминафиналето, нокаут-фаза во која немаат право на поправен, секој кикс скапо ќе ги чини кандидатите за вредниот трофеј. А, сигурно, дека свежината и добрата атмосфера ќе бидат дел од сегментите што ќе одлучуваат.
Како мал, но значаен дел, секако нефудбалски, е и сексот на фудбалерите. Сите репрезентации си имаат свој камп во Бразил и свои правила во однос на тоа дали е дозволен или забранет сексот за време на мундијалот.
Повеќето експерти од оваа област велат дека водењето љубов пред натпревар претежно им помага на спортистите и не влијае негативно врз нивната психофизичка подготвеност.
Но, четворица селектори, сепак, одлучија да не го послушаат гласот на науката. Фабио Капело е искусен стратег, ја предводи Русија на мундијалот и немаше слух за потребите на репрезентативците на „зборнаја“. За нив сексот е забранет на Светското првенство, што значи дека за Кержаков, Игнашевич, Березуцки, Акинфеев и за останатите познати фудбалски ѕвезди од рускиот строј нема зелено светло за љубовна игра со своите сопруги или девојки од самиот почеток на шампионатот, од 12 јуни, па сѐ додека се во игра за освојување на трофејот.
По стапките на Капело тргна и селекторот на Босна и Херцеговина, Сафет Сушиќ, потоа и Мигел Ерера од Мексико и Хорхе Сампаоли од Чиле. Сите четворица им забранија на своите избраници каков било контакт со понежниот пол.
Интересно е што и искуствата се различни, па на Мексиканците и на Чилеанците забраната воопшто не им пречи бидејќи играат одлично и веќе се пласираа во нокаут-фазата. Кај Босанците не е таков случајот, а дали токму отсуството на секс за време на мундијалот влијаеше на нивната елиминација на СП ќе кажат експертите.
Сколари со ограничување за Бразилците – секс „да“, акробации никако
Луиз Фелипе Сколари има интересна стратегија наменета за Бразилците. Искусниот волк не смее да си дозволи луксуз да испадне во раната фаза, цела нација го очекува шестиот трофеј, па го искористи моментот и ги предупреди Нејмар, Оскар, Луиз и останатите ѕвезди од „селекао“. Секс може, но без акробации. Интересно, интригантно, но Сколари верува дека има модел да им даде слобода на своите избраници и надвор од теренот, но со ограничување.
– Ме прашувате дали ќе дозволам секс за играчите пред натпревар на мундијалот. Да, секако. Играчите ќе имаат можност за такво нешто, но во рамките на нормалното. Акробации не се дозволени бидејќи не ми требаат исцрпени фудбалери на терен – изјави Сколари.
Бразил има императив да ја освои титулата и да ја поправи грешката што пече повеќе од половина век. Во 1950 година беа домаќини на СП и на „Маракана“ пред 200 илјади гледачи во финалето Уругвај им ја „украде“ титулата, што сѐ уште буди лоши спомени кај „кариоките“. Сколари не сака да дозволи работите да излезат од контрола, а селекторот што го доведе Бразил до светскиот трон во 2002 година, две лета подоцна се „лизна“ на свој терен. Со Португалија, чиј селектор беше Сколари, на домашен терен во Лисабон на сензационален начин го загуби финалето против Грција на ЕП 2004 година. Сега Сколари мисли и на најмалите детали, а на интересен начин презентираше каков секс им е дозволен на Нејмар и на останатите големи ѕвезди од бразилскиот состав.
Строга забрана имаше за репрезентативците на БиХ, а легендарниот Папе, Сафет Сушиќ, на мошне сликовит начин образложи зошто не им дозволува водење љубов на Џеко, Пјаниќ, Мисимовиќ и на останатите „змејови“.
– Не сме на туристичко патување во Бразил. Дојдовме да играме фудбал на Светско првенство, нешто што е највредно во оваа игра. Ако сакаат фудбалерите, нека мастурбираат, сексот не е дозволен за време на турнирот – изјави Сушиќ.
Постот не помогна и БиХ е елиминирана уште по првата фаза на шампионатот.
Французите водат љубов и гледаат на часовник, по полноќ е забрането
Дидие Дешамп беше голема фудбалска ѕвезда и одлично ги познава состојбите во најважната споредна работа на светот. Заради мир во куќа го елиминира Самир Насри од составот на Франција и „триколорите“ играат суперфудбал во Бразил. Една од мерките која е многу интересна, а ја смисли селекторот е играчите да можат да имаат секс за време на турнирот, но со ограничување до полноќ.
– Ако сакаат, нека гледаат и на часовник, но дисциплина мора да има. Секако, и добра атмосфера за да се надеваме на успех. Нацијата го очекува тоа од нас и нема да дозволам ситни работи да ги нарушат мирот и дисциплината во составот – изјави Дешамп.
Меѓу поинтересните правила е тоа од таборот на Костарика. Најпријатното изненадување на првата фаза во Бразил игра модерен фудбал, составот е од релативно непознати играчи, грото од домашната лига, а имаа вистински предизвик. За Руиз, Кемпбел и за останатите членови на „лос тикос“ сексот беше забранет во првата фаза по групи. Костарика победи два поранешни светски прваци, Уругвај и Италија, па сега играчите може да здивнат. Од нокаут-фазата може да спијат со своите сопруги или девојки. Слично е и со Нигерија, но таму фудбалерите се поделени на интересен начин. Ергените „постат“, а женетите може да си заминат в кревет со своите сопруги.
Сексот им удри в глава на Англичаните
Досега најмногу секс-афери на шампионатот дојдоа од таборот на Англичаните. Папараците фатија гола девојка на балконот на една од собите каде што се сместени репрезентативците на гордиот Албион. Атмосферата по дебаклот на Англија ја вжешти и аферата со Лук Шо, бекот на Саутемптон. Тој побарал од својата пријателка во Бразил да ја донесе и сестрата-близначка на партија секс во тројка. Шо не демантира, а селекторот Рој Хоџсон веројатно е пишман што им дозволи на репрезентативците потполна слобода во сексуалните игри. Медиумите со „отровни стрели“ се распукаа по него и по фудбалската експедиција на гордиот Албион, која повторно се враќа дома со празни раце од големо натпреварување, и тоа со разочарувачка елиминација уште по првата фаза.
Сосема спротивно, слободата во кревет одлично „им легна“ на Холанѓаните и на Германците, а двете реномирани фудбалски машинерии сигурно газат кон завршницата. Љубов и фудбал одлично им прилега на расцветаните „лалиња“ во Бразил и на популарниот „елф“ од Германија. Потполна слобода во тој сегмент имаа и Шпанците, кои се најголемото разочарување на мундијалот, освежувањето Австралија, иако испадна по првата фаза, како и САД, Швајцарија, Уругвај и Италија.
(Пишува: Зоран Поповски
Текст објавен во 95. број на неделникот „Република“, 27.06.2014)
