Актуелниот шампион со срамен старт, Холандија и врати на Шпанија за загубеното финале на минатото Светско првенство во Јужна Африка. Холандија со убедливи 5-1 го започна Мундијалот, Шпанците иако први го отворија резултатот, сепак доживеаја вистински дебакл.
Шпанија поведе со 1-0 откако Диего Коста одработи пенал, а Чаби Алонсо успешно реализираше од белата точка. Во 27.минута, „црвената фурија“ поведе.
Но, фуријата потоа продолжи од холандска страна. Робин Ван Перси со фантастичен удар со глава во 44.минута израмни на 1-1 и најави одлично второ полувреме.
Робен имаше вистинско шоу на теренот, тој го донесе водството на Холандија, а потоа Де Вриј во 65.минута најдобро се снајде во шеснаесетникот на Шпанија и по прекин на игра постигна трет гол во мрежата на светскиот шампион, а нокаутот дојде од најголемите ѕвезди, Ван Перси и Робен, кои уште по еднаш се запишаа во листата на стрелците.
