Веќе е втор ден од мундијалот, а нѐ очекува спектакл, реприза на финалето од минатото Светско првенство меѓу Шпанија и Холандија.
Пред четири години во Јужноафриканската Република, Шпанците со голот на Андрес Иниеста првпат станаа шампиони во светот, а тој пораз сѐ уште ги боли Холанѓаните.
– Тоа е лузна која никогаш нема да зарасне. Секогаш ме растажува кога ќе се сетам на тоа – изјави Снајдер.
Од друга страна, Висенте дел Боске го има истиот тим што доминира во европскиот и светскиот фудбал веќе осум години.
– Нашиот стил на игра е јасен. Сакаме да доминираме на натпреварите и да ја имаме топката. Имавме многу успеси благодарение на тој стил на игра, зошто би ја менувале. Ни даде многу и се надевам дека повторно ќе пишуваме историја – изјави Чави Ернандес.
Дуелот меѓу Шпанија и Холандија е на програмата од 21 часот на арената „Фонте нова“ во Салвадор.
