Груевски: Конкретни чекори против глобални проблеми

Премиерот Никола Груевски денеска во рамките на вториот ден од 6-тиот економски форум „Астана 2013” се обрати на тематската расправа „Дијалог на лидери”, на која се говореше за генералните предизвици со кои се соочуваат државите во поглед на светската криза, како и обезбедувањето на балансиран економски раст. Груевски посочи дека светската економија се уште се наоѓа под влијание на глобалните предизвици, а стручната јавност е под постојаната неизвесност за утврдување на решенија за проблемите предизвикани од должничката криза во Европа.

Премиерот истакна и дека предизвиците со кои европските држави се соочуваат се реалност, и напорите на економиите треба да бидат насочени кон премостување на тие предизвици преку постојана инвестициска активност, реформи и мерки кои ќе овозможат услови за нивно побрзо надминување.

-Како и да е ова беше одлична можност, слушнав различни мислења, различни видови на проблеми, како различни држави ја чувствуваат кризата и се справуваат со неа, но и да се сретнат многу луѓе. Посебно во вчерашниот ден беше одлична прилика пред околу 3 илјади луѓе од кои најголем број бизнисмени да се презентираат можностите за правње бизнис и инвестирање во Македонија, што ми беше и една од основните цели за доаѓањето во Казахстан, рече Груевски.

Тој посочи дека за надминување на глобалните проблеми се потребни конкретни чекори кои на државите им се добро познати, но дека нивната реализација зависи главно од политичката волја на лидерите во тие држави. Потребно е постојано прилагодување на економиите на променливите околности бидејќи новите услови тоа го бараат. Во таа насока, премиерот Груевски ја истакна важноста од проактивната улога на државите кои мора будно да ги следат случувањата, и да обезбедат соодветни одговори на потребите на економијата. Потрагата по инвестиции, развојот на пазарните услови, како и целосната поддршка на раководствата на државите на тој процес е од исклучителна важност.

Премиерот Груевски посочи дека иницијативите како Г-Глобал во контекст на актуелните предизвици, може да помогнат
бидејќи така се овозможува отвореност и окрупнување на силите во изнаоѓањето на заеднички решенија. На тој план секоја иницијатива за надминување на реалните предизвици треба да биде поздравена.
-Имаше различни размислувања за тоа како да се менаџираат состојбите во иднина. Се размислува и за т.н. Г- глобал, во кое што би влегле поголем број држави, отколку што влегуваат во Г-20 и дали тоа би дало некој поголем допринос во целата оваа ситуација, затоа што Г-20 е премногу фокусирано на европската криза, истакна Груевски.
На „Дијалогот на лидери” свое обраќање имаше и премиерот на Република Казахстан, Серик Ахметов кој истакна дека и Република Казахстан е зафатена од влијанието на глобалната криза, и токму затоа беа преземени повеќе кризни мерки со цел да се превенира нивното штетно влијание. Поволната геостратешка позиција на Казахстан како поле во кое се среќаваат влијането на Европа и Азија и искористеноста на енергенсите овозможи раст на економијата на Казахстан. Премиерот Ахметов посочи дека инвеститорите и луѓето од водечките компании од Казахстан се заинтересирани за диверзификација на капиталот. Премиерот на Република Казахстан истакна дека полиња кои се од исклучителна важност за надминување на кризата се инвестициите во градежништвото, енергијата и патната инфраструктура.

Пред присутните се обрати и поранешниот премиер на Република Италија и поранешен претседател на Европската комисија, Романо Проди, кој нагласи дека главниот предизвик на државите од Европа е стабилизацијата и нормалното функционирање на пазарите. Тој посочи дела глобалната криза функционира во Европа и следи период на прилагодување по кој што ќе настапи преструктуирање на глобалните сили. Г-динот Проди истакна дека глобалните проблеми треба да бидат заеднички решавани по пат на дијалог, толеранција и меѓусебно разбирање.

На маргините на економскиот форум „Астана 2013“, премиерот Никола Груевски оствари одделни разговори со оранешниот премиер на Италија и претседател на ЕК, Романо Проди, со претседателот на Економско-социјалниот совет на ОН, Нестор Осорио, генераниот секретар на Конференцијата на ООН за трговија и развој, Супачаи Паничпакди.
Говорниците се осврнаа на глобалното движење на пазарот и економиите, на потенцијалите за инвестирање и на потребата за постојано прилагодување на државите кон барањата на светската економија. Тие ја потенцираа важноста од зајакнување на капацитетите и отвореноста на државите за соработка на економски и политички план.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.