„Алкалоид“ со раст на консолидираните продажби од 6 отсто, инвестиции од над 986 милиони и 102 нови вработувања

„Алкалоид АД“ Скопје оствари позитивни финансиски резултати во периодот јануари – декември 2015 година, покажуваат неревидираниот единечен и неревидираниот консолидиран Биланс на успех.

Во периодот јануари – декември, вкупните консолидирани продажби достигнуваат 7.860 милиони денари, што е за 6 отсто повеќе во споредба со истиот период лани. Вкупниот консолидиран извоз на компанијата, пак, е зголемен за 10 отсто. Зголемување од 2 отсто е забележано и кај добивката пред финансиски трошоци, даноци и амортизација (ЕБИТДА), која достигнува 1.157 милиони денари, додека нето консолидираната добивка од 666 милиони денари е зголемена за 8 отсто, покажува консолидираниот Биланс на успех, соопштуваат од компанијата.

Според единечниот Биланс на успех, пак, во периодот јануари – декември, продажбите достигнуваат 6.018 милиони денари, што е за 4 отсто повеќе во споредба со истиот период лани. Добивката пред финансиски трошоци, даноци и амортизација (ЕБИТДА), која изнесува 1.070 милиони денари, бележи намалување од околу 1 отсто, додека нето добивката е зголемена за 3 отсто.

Вкупните инвестиции во основни средства во периодот јануари – декември 2015 година изнесуваат 986.806 илјади денари.

Во периодот јануари – декември 2015 година во Алкалоид се реализирани 102 нови вработувања во Република Македонија.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.