Се обиделе да затајат данок пред очите на премиерот

Персоналот на еден познат белградски рибен ресторан направил пред неколку дена погрешен потег – на премиерот Александар Вучиќ за послужената вечера наместо фискална сметка му донеле „предсметка“ која не се внесува во системот и која не се користи при пресметување данок на додадена вредност (ДДВ), пишува српски Курир.

– По завршениот оброк, премиерот ја побарал сметката, а персоналот наместо фискална сметка му издал обична пресметка. Двете сметки слично изгледаат, само што на едната пишува предсметка, а разликата е голема. Со обичните пресметки рестораните и останатите деловни објекти го избегнуваат плаќањето на данокот. Кога тоа го видел, премиерот бурно реагирал и предупредил дека за вакви пропусти следува затворање на ресторанот – рекол извор за „Курир“.

Со ова вработените во ресторанот се обиделе да ја „оштетат“ државната каса и да затајат данок пред самиот претседател на Владата, кој укажува на тоа дека неиздавањето фискални сметки е најголем проблем во борбата против нелегалната трговија и сивата економија.

– Нашиот најголем проблем. Јас не можам никому, па ниту на членовите на сопственото семејство да им објаснам дека треба да бараат фискална сметка. И дека кога некој не ви ја издава, тоа значи дека краде од вас, од вашите училишта, од вашето дете – рекол Вучиќ во јуни.

Нејасно е како и покрај ваквите изјави, вработените во ресторанот се осмелиле токму пред очите на премиерот да ја оштетат државната каса