Какви ќе бидат училишните униформи на основците во Аеродром? (фото)

Учениците во основните училишта во скопската населба Аеродром од септември ќе носат училишни униформи. Првиот комплет ќе биде бесплатен.

– Со тоа сакаме да се постигне чуство на еднаквост меѓу децата и да нема поделби и разлики меѓу нив во начинот на облекување. Од друга страна, пак, на родителите ќе им се намалат трошоците за купување гардероба, која некои родители не можат да си ја дозволат – изјави Ивица Коневски, градоначалникот на Аеродром.

Министерот за образование и за наука Спиро Ристовски го поздрави проектот како позитивен пример и апелираше овој тренд да го прифатат и другите општини во Република Македонија.

Училишната облека ќе се состои од сиви панталони, бели блузи и тегет елеци со амблем, на кој ќе биде извезено логото на општина Аеродром и името на училиштето. Девојчињата ќе имаат можност да одберат здолниште или панталони.

Целта на овој проект е сите ученици да бидат облечени во униформи, а со тоа, според градоначалникот Ивица Коневски, основните училишта во општина Аеродром ќе ги достигнат стандардите на училиштата од европските метрополи.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.