Актуелниот селектор на холандската фудбалска репрезентација, Луј ван Гал, се поврзува со тренерско место во Тотенхем.
Ван Гал и директорот на клубот, Даниел Леви, веќе имале средба на која е разговарано за испразнетото место на клупата на „спарси“. Договорот на Ван Гал со холандската фудбалска федерација му истекува по СП во Бразил и со сигурност нема да биде продолжен бидејќи челниците на федерацијата веќе имаат потпишано договор со Гус Хидинк како наследник на Ван Гал по СП.
– Никогаш не сум ги коментирал понудите што сум ги добивал. Не е тајна дека имам желба да работам во Англија. Сепак, за да се одлучам на таков чекор и да потпишам договор со Тотенхем, ќе мора прво да завршам со обврските во холандската репрезентација – изјави Ван Гал за холандските медиуми.
Луј ван Гал својата тренерска кариера ја почна во Ајакс, од каде што продолжува во Барселона со која ги има најголемите успеси. Бил тренер и на Баерн Минхен и Аз Алкмар.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
