Кулинарски разговори и меѓународна изложба на Недела на дизајнот во Скопје

Во рамки на Недела на дизајнот во Скопје (СДВ), традиционално најмногу внимание привлекува меѓународната изложба ЕКСПО. Годинава, оваа целина ја сочинуваат 8 компании од Македонија, 15 млади дизајн студија од регионот и две Aкадемии за Дизајн од Белград, сите со стотина производи кои веќе ги има на пазарот. Ќе бидат изложени прототипи на маси, столови, штендери, клуб-маси, фотелји, расвета, радијатори и други производи.

Компанииете „Завар дизaјн”, „Мимако вуд”, „We and Nature”, „Орнамакс”, „Лукс”, „Адора инженеринг”, Кирче Стојоски, “Mariguccha” ќе се претстават со новитети во нивните асортимани и последни достигнувања во продукт дизајнот.

Tимот „Абовас архитекти”, Марија Малетиќи “Моба” на ЕКСПО ќе изложат дизајнерски маси, Анѓела Мариновиќ, Ѓина Сврака, Јелена Митиќ и Марко Ољача ќе изложат ламби, „Бенуси & Фиш” со мебел за деца, „Бланко” и „Јока” со дизајнерски додатоци, Богоје Бојовиќ со мебел за градини и канцеларии, „Суперхерина” со фотелји и детски мебел, „Табуши” со табуретки и барски столици.

На изложбата ќе се претстави и проектот У1 НА1, уметничкото име на изборниот предмет Архитектура на корисни предмети на Архитектонскиот факултетот при Универзитетот во Белград, чија цел е да ги обучи студентите да развиваат мултифункционален мебел.

Покрај изложбите кои се во главниот фокус на овогодинешното издание на СДВ, активностите продолжуваат со гастрономските истражувања низ серија на три работилници насловени Кулинарски разговори. Ова кулинарско ќоше е сосема нова дисциплина, долго подготвувана од организаторите која има за цел преку храна и дружење да ги доближи карактерите на општествено и социјално одговорни и познати личности.
Популарниот и наградуван белгиски шеф, Марк де Јонг, со кулинарско шоу на отворена сцена ќе готви и дизајнира храна заедно со гостите кои ќе ги учи како да си ги подобрат готвачките вештини, а од нив ќе учи за поезијата, еко-активизмот и модниот стил.

На 23.ноември со почеток во 16 часот, темата е поезија, а со Марк де Јонг ќе готви и дебатира наградуваната македонска поетеса Марта Маркоска. На 24.ноември во 15 часот ќе се готви и дискутира на тема еко-активизам со актерката Ирена Ристиќ и тимот на „Не биди ѓубре“. Ристиќ е истакната активистка и лидерка на популарната граѓанска иницијатива „Не биди ѓубре“ и на СДВ ќе ги споделат своите искуства од нивната кампања. Додека на 25. ноември со почеток во 15 часот= темата е мода, а со Марк де Јонг ќе готви менаџеркиот тим на Скопскиот моден викенд.
Недела на дизајнот во Скопје е дело на Јавна соба – Центар за дизајн и иновација, во соработка со Делегацијата на германското стопанство со канцеларија во Македонија.

Активностите ќе се реализираат во Јавна соба и Лукс секој ден од 10:00 до 01:00 часот, а влезот за сите посетители е слободен.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.