Мицкоски: ВМРО-ДПМНЕ се подготвува за следниот циклус претседателски избори

Лидерот на опозициската ВМРО-ДПМНЕ посочи и дека доколку парламентарното мнозинство донесе одлука, партијата што ја предводи, е подготвена и за предвремени парламентарни избори.

– ВМРО-ДПМНЕ ќе ги издржи сите притисоци, ВМРО-ДПМНЕ од ден на ден е се посилно, ВМРО-ДПМНЕ се подготвува за следниот претседателски изборен циклус, кој ќе се одржи напролет, а доколку парламентарното мнозинство одлучи, ВМРО-ДПМНЕ е подготвено за предвремени или редовни парламентарни избори, истакна Мицкоски, кој претходно учествуваше на француско-германската комеморација, што денеска се одржа во Битола, посветена на 11 Ноември, Ден на примирјето.

Посочи дека се надева дека многу скоро Република Македонија ќе ја добие заслужената шанса да биде дел од европското семејство, затоа што, како што рече, на крајот од денот, интерес на сите граѓани и на сите политичари е Македонија да успее.

– На конгресот во Хелсинки остварив повеќе средби со претставници на сестринските партиии, ги информирав за политичкиот прогон на членови на ВМРО-ДПМНЕ, за предизвиците пред кои е исправена партијата ВМРО-ДПМНЕ во Македонија и други актуелни општествено политички теми. Воедно, ја искористивме можноста да побараме од сестринските партии да лобираат Република Македонија што е можно побрзо да стане дел од европското семејство, бидејќи не се битни нашите лични фрустрации или лични кариери, битно е Македонија да успее, додаде Мицкоски.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.