Надлежниот јавен обвинител издал наредба за медицинско психијатриско вештачење на двајцата осомничени за смртта на младиот Никола Саздовски – Саздо, информираат од Основното јавно обвинителство.
Адвокатот на еден осомничените Насер Рауфи очекуваше денеска да направи увид во доказите, но од Обвинителството информираат дека се уште прибираат вербални и материјални докази.
„Откако ќе ги приберат сите докази двајцата осомничени ќе направат увид во доказите и ќе дадат исказ во Обвинителството. По прибирање на сите докази во истражната постапка, двајцата осомничени и нивните бранители согласно Законот за кривична постапка ќе бидат повикани да извршат увид во доказите, при што осомничените кои досега го користеа правото на молчење, ќе можат да дадат своја одбрана“, велат од Обвинителството за „Независен весник“.
Рауфи очекуваше неговиот клиент уште неделава да даде исказ во Обвинителството, но сега тоа ќе зависи од динамиката на прибирањето на останатите докази во овој случај.
Двајцата напаѓачи на Саздовски се наоѓаат во притвор во затворот во Шутка, додека третиот осомничен Јетон Љужа е се уште во бегство. Во петокот, речиси еден месец од нападот врз Саздовски на барање на обвинителството, Министерството за внатрешни работи распиша меѓународна потерница по него.
Обвинителството обезбеди и вештачење од Институтот за судска медицина по кое го преквалификува делото за тројцата осомничени од насилство со смртни последици во убиство на свиреп начин. Дваесет и едногодишниот Саздовски беше нападнат на 29 јуни на автобуската постојка во Автокоманда. Според верзијата на напаѓачите, тие го виделе Саздовски случајно и без никаква умисла го нападнале поради нетрпеливоста меѓу нивните навивачки групи, Комити и Шверцери.
По десет дена во болница Саздовски им подлегна на повредите, а според првичните информации обдукцијата покажала дека во нападот на Саздовски не биле користени никакви предмети.
Напаѓачите Скендер Д. и Бесир Б. се на возраст од 19 и 20 години, а веќе се во затвор. Нивниот врсник е во бегство. (Ф.Ф.С.)
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
