Ако Хрватска ја освои светската титула, во земјата нема да се работи до септември, изјави селекторот Златко Далиќ на пресконференцијата пред полуфиналето на Мундијалот 2018 против Англија.
Средбата е денес од 20 часот на стадионот „Лужники“ во Москва.
– Ништо не може да ме изненади во нашата земја. Во Хрватска живеат четири милиони луѓе и има четири милиони фудбалери и четири милиони тренери, сите знаат сè за фудбалот. Тешко ви е да замислите како се слави секоја наша победа. Нашите фанови се нашето гориво, фудбалот ги прави луѓето среќни и дури не можам да замислам што ќе се случи, ако ја освоиме светската титла. Ако станеме светски шампиони, никој нема да работи до септември – рече Златко Далиќ.
Селекторот изрази надеж дека ќе добие поддршка од руските навивачи, и покрај скандалот по четвртфиналето меѓу Хрватска и Русија, кога дефанзивецот Домагој Вида и скаутот Огнен Вукојевиќ извикуваа „Слава на Украина“.
– Во Русија насекаде не пречекуваа како свои и на секој стадион нѐ поддржуваа. Денес очекуваме поддршка вклучувајќи и од руските навивачи. Фудбалот ги обединува луѓето низ целиот свет, секогаш ќе се сеќаваме на овие неколку недели во Русија. Ви благодариме за гостопримството – рече Далиќ.
Тренерот смета дека неговите играчи имаат сила да ја поразат Англија. Тој го пофали лидерот на тимот Лука Модриќ за неговата самодоверба во секој натпревар.
– Лука покажува волја, карактер и желба за игра. Тоа е неговото последно светско првенство и сака да остави трага. Но и сите други имаат свој придонес. Во нашиот тим има добри играчи кои играат за најдобрите тимови во Европа – рече меѓу другото Далиќ.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.