Перински: Анѓушев си додели тендер сам на себе, веднаш да си поднесе оставка

Кочо Анѓушев си додели тендер сам на себе од 2.6 милиони евра и тоа од државната фирма ЕЛЕМ на својата фирма „Фероинвест“. Можеби Кочо Анѓушев се откажа од својата плата кога стапи на функцијата, но очигледно своето домашно салдо го надокнадува со тендерите. И тоа ни помалку ни повеќе, туку милионски тендери во висина од 2.6 милиони евра, истакна членот на ИК на ВМРО-ДПМНЕ Златко Перински на денешната прес-конференција.

– Смешно е образложението на Кочо Анѓушев дека ништо не е спорно во добивањето на тендерот од страна на неговата фирма „Фероинвест“ во ЕЛЕМ. Анѓушев, се обидува да ја изманипулира јавноста, со смешно е оправдувањето дека тој не е управител на фирмата „Фероинвест“, туку дека управител е друго лице, а тој е само сопственик. По таа логика, утре фирма во сопственост на министерот за здравство може да ги снабдува болниците со лекови. Фирма во сопственост на министерот за одбрана, може да ја снабдува војската со муниција и униформи. Фирма на министерот од МВР, може да ја снабдува полицијата со оружје и опрема. Ако ова не е конфликт на интереси за Социјал-демократскиот сојуз, тогаш не знаеме што е конфликт на интереси, потенцираше Перински.

Замислете, додаде тој, каков скандал ќе беше пред 1 година доколку владата предводена од ВМРО-ДПМНЕ и нејзините вицепремиери добија тендер од ЕЛЕМ во висина од 2.6 милиони евра.

– И малите деца знаат дека ова е скандал од огромни размери. Вицепремиерот во владата на Заев и Социјал-демократскиот сојуз, си додели тендер сам на себе во висина од 2.6 милиони евра. Ние предупредивме уште претходно за ваквите „бонбона бизнис” намери на оваа влада, дека нивната цел е само личниот интерес и личното богатење со парите на граѓаните, а тоа се потврди и изминатите 100 дена. Исто така и предупредуваме дека постои реална и сериозна опасност, преку воведување на либерализацијата на пазарот на струјата, крајната цел да биде милионски профит на фирмите на Кочо Анѓушев. Затоа, уште еднаш го повикуваме надлежното Јавно обвинителство да утврди кривична одговорност за тоа како се влијаело и под кои услови тендерот паднал во рацете на фирмата „Фероинвест“ која е во сопственост на вицепремиерот Кочо Анѓушев.

Исто така, вели Перински, го повикуваме Кочо Анѓушев, после овој срамен скандал каде што на најдрзок можен начин се обиде парите на граѓаните да ги смести во својот џеб, да си поднесе неотповиклива оставка и никогаш повеќе да не помисли да ги стави своите раце и да располага со народните пари.

– Граѓаните бараат одговорност. Граѓаните ќе стават крај на ваквото криминално работење на 15-ти октомври кога ќе кажат што мислат за нечесното работење на владата на Зоран Заев и владата на Социјал-демократскиот сојуз.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.