Граѓаните најмногу губат од лицемерите на СДС. Затоа таквата политика мора да запре и мора да се почитува дадениот збор и ветување, кажа Жаклина Пешевска од ВМРО-ДПМНЕ на прес конференција. Таа кажа дека последен доказ за дволичноста на СДС е одбивањето да се укине радиодифузната такса.
-СДС во март месец говореше дека ако имало влада, граѓаните немало да плаќаат радиодифузна такса. Тоа го зборуваат и Дамјан Манчевски и Радмила Шекеринска. Денес сме јули месец, а СДС бега како ѓавол од темјан од своето ветување со кое ги манипулираа граѓаните од декември па се до сега. Радмила Шекеринска кажа на 30-ти март: „Ако денес имавме нова Влада, граѓаните веќе ќе беа ослободени од плаќање радиодифузна такса“. Еве СДС има влада, Радмила Шекеринска е во владата речиси 40 дена, ама немаат абер да ја укинат радиодифузната такса, па дури и избегаа иницијатива на ВМРО-ДПМНЕ таа да биде укината, изјави Пешевска.
Пешевска кажа дека пратениците на ВМРО-ДПМНЕ го поставија токму овој проект како предлог измени на закон пред Собранието на Република Македонија и тоа во скратена постапка со цел барем едно ветување кое го даваше СДС пред изборите да го види светлото на денот. Таа напомена дека резултатот од нивната иницијатива беше очекуван, СДС да почне да бега, да бара изговори и да не го исполни тоа за кое што бараа доверба од граѓаните.
-Ова само ја разоткрива во целост намерата на СДС која ја имале пред изборите, да лажат, да ветуваат и да манипулираат само да се доберат до власт, а потоа да се грижат како да вдомуваат партиски војници по институции, како да прават зделки и најлошо од се да спроведуваат туѓи агенди на штета на македонските национални и државни интереси. СДС не смее вака да се однесува и кон другите ветувања. Граѓаните очекуваат за три до шест месеци влез во ЕУ и НАТО. Очекуваат минимална плата од 16 илјади денари и просечната плата 500 евра. Докторите очекуваат плата од 100.000 денари, а сите сакаме да ги видиме новите 500 километри автопат, порача Пешевска.
Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
