Филмот „Јавачи на коњи“ со интензивен фестивалски живот

Независниот македонски филм „Јавачи на коњи” го започна своето фестивалско патување низ Европа.„Јавачи на коњи“ е еден од осумте (од над 800 пријавени филмови од цела Европа) селектирани наслови во официјалната конкуренција за награди на „Краина филм фест“. Фестивалот ќе се одржи во Босанска Краина од 23 до 30 јули, а „Јавачи на коњи“ ќе биде прикажан како дел од натпреварувачката програма.

На 27 јуни  филмот ќе биде прикажан и во Балчик, Бугарија како дел од програмата странски филмови на фестивалот „Во Палатата“, по што ќе следува сесија прашања и одговори со сценаристот и актерот Никола Кузелов.  In the Palace International film Festival е прогласен за еден од 25-те најпрестижни фестивали во Европа.

Инаку, „Јавачи на коњи“ на 16-ти овој месец  беше прикажан и во рамките на International Boat of Culture Festival во Лоџ, Полска , а неколку дена подоцна ја доживеа и својата премиера во „Дом на киното“ во Софија, Бугарија, како дел од целовечерна програма посветена на филмот, вклучувајќи негова проекција и отворен разговор со режисерот Марјан Гавриловски.

Во „Јавачи на коњи“ приказната го следи животот на двајца бездомници кои живеат под еден запуштен мост. Мапет е хендикепиран, а Алек се грижи за него опсесивно. Деновите им минуваат еднолично додека не се појави Сара, уличарка која западнала во неволја. Тие криејќи ја кај нив стануваат како семејство. Еден ден Алек наоѓа стара запуштена куќа и се преселуваат во неа. Но имаат нов проблем, Мапет снемува од неговите лекарства. Бидејќи немаат пари да ги купат, Сара оди да краде и никогаш не се враќа. А Мапет умира пред очите на Алек.

Во главните улоги настапуваат Никола Кузелов, Бобан Кулевски и Долорес Поповиќ. Режијата е на Марјан Гавриловски, а сценариото на Никола Кузелов.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.