Димитров: Итно донесување закон што ќе ги штити угледот, честа и животот на лекарите

Претседателот на Мaкедонското лекарско друштво (МЛД), Горан Димитров, во изјава пратена до медиумите предложи итно донесување закон во Собранието што ќе ги штити угледот, честа и животот на лекарите при извршување на својата професија.

Според него, овој закон треба да има двојно поголеми казни за извршените деликти кон лекарите и целиот медицинскиот персонал и тој да биде спроведуван и истакнат во секоја медицинска ординација, амбуланта, болница.

Димитров го посетил доктор Љубомир Огњеновиќ, кој вчера беше ранет со огнено оружје на своето работно место во одделението за дигестивна хирургија на Клиничкиот центар „Мајка Тереза“. Му изразил желби за побрзо оздравување.

– Сите лекари се револтирани од овој немил настан и од тоа што му се случи на колегата, кој во нашите кругови кај пациентите е омилен и претставува олицетворение на морална, етичка и на хумана личност посветена на својата професија. Не заборавајте дека со нашата заклетва ние сме обврзани да помагаме и на човек што претходно убил човек, човек што тепал дете, човек што удрил бремена жена во сообракајна незгода – стои во изјавата на Димитров.

Republika.mk - содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.